Во просториите на Педагошкиот факултет „Св. Климент Охридски“ во Скопје се одржа настанот по повод 15 март Светскиот ден на правата на потрошувачите под мотото за 2025 година “Праведна транзиција кон одржлив начин на живеење“, активност на Бирото за развој на образованието од Програмата за заштита на потрошувачите за 2025 година („Службен весник на РСМ“ бр. 24/25).

На настанот имаше обраќање проф. д-р Билјана Камчевска, декан на Педагошкиот факултет „Св. Климент Охридски“ во Скопје, домаќинот на настанот и традиционален соработник на Бирото за развој на образованието во креирањето на образовните политика во земјата.

Свое обраќање имаа в.д. директорката на Бирото за развој на образованието, г-ѓата Милка Тримчевска и в.д. заменик директорката на Бирото за развој на образованието г-ѓата Шпреса Селими, кои ги поздравија присутните, укажувајќи на важноста од финансиската едукација на младите.

Настанот со свои презентации го збогатија експерти во областа г-ѓа Адиса Фазлиоска, раководител на Одделението за заштита на потрошувачите при Минитерството за економија и труд, г-дин Љуан Имери, Член на бородот на глобалната мрежа и регионален претставник за Европа и Централна Азија – Афлатун и г-ѓата Татјана Тасевска, правен советник во Организацијата на потрошувачите на Македонија.

Значајно место на настанот имаше објавањето на победниците на годинешниот Ликовен конкурс чија цел беше децата и учениците на креативен начин да го изразат своето критичко размислување по однос на одржливата потрошувачка, односно за итната потреба од суштински промени во начинот на кој се храниме, како патуваме, како ги загреваме и ладиме нашите домови, какви производи и услуги купуваме и користиме. Ликовниот конкурс се организираше во четири категории:

• прва категорија: ИГРАЧКА НЕ ФРЛАЈ, СО ЉУБОВ ДОНИРАЈ (деца од детските градинки на возраст од 4-6 години)

Беа доставени 58 ликовни творби од вкупно 19 детски градинки.

• втора категорија: НУЛА ОТПАД ОД ХРАНА – ПОДОБАР И ПОЗДРАВ ЖИВОТ (ученици од прво до петто одделение – одделенска настава)

Беа доставени 116 ликовни творби од вкупно 52 основни училишта.

• трета категорија: ОБЕЛКУВАЈ СЕ ПАМЕТНО – ОДРЖЛИВА МОДА (ученици од шесто до деветто одделение – предметна настава)

Беа доставени 133 ликовни творби од вкупно 53 основни училишта.

• четврта категорија: ОДРЖЛИВ ТРАНСПОРТ – РЕШЕНИЕ ЗА ЗЕЛЕНА ИДНИНА (ученици од средните училишта)

Беа доставени 38 ликовни творби од вкупно 19 средни училишта.

Беа доделени прво, второ и трето место по категорија одделно.

На следниот линк се наградените учесници на Ликовниот конкурс 2025.

Голема благодарност до сите партнери коишто го потпомогнаа настанот со обезбедување награди за децата и учениците победници на ликовниот конкурс: СЕТЕК – сѐ за техника, ПОРШЕ Македонија, КАМ Маркет, Халк Банка, Сербез и ЕАМ од Штип.